ما معني فيزا شنجن
الفيزا الشنجن دي عباره عن فيزا بتشمل 26 دوله من اوروبا .. بمجرد ما بتاخدها من اي بلد من ال 26 تقدر تدخل باقي ال 25 بلد الباقيين بدون اي ختم او اي تأشيرة تانية.
والدول اللي تقدر تتدخلهم بمجرد حصولك علي فيزا شنجن هم: إسبانيا، البرتغال، فرنسا، إيطاليا، ألمانيا، النمسا، سويسرا، إيسلندا ، الدانمارك، لوكسمبورغ، هولندا، بلجيكا، مالطا وليختنشتاين و استونيا، ولاتفيا، وليتوانيا وجمهورية التشيك، والمجر ، وبولندا وسلوفاكيا، وسلوفينيا , اليونان , السويد و فلنندا والنرويج.
الاوراق المطلوبة للتقديم علي فيزا شنجن
في مستندات متكررة وبتطلبها اي اي سفارة وفي اوراق بيكون مطلوب من كل سفارة علي حدا بشكل مميز. وفيما يلي هانتعرف علي كل الاوراق المطلوب للحصول علي فيزا شنجن الي اوروبا.
كشف الحساب البنكي:
- جميع السفارات التابعة لدول الشنجن تطلب كشف حساب بنكي لاخر 6 شهور ولكن بلجيكا بتطلب كشف حساب بنكي لاخر 3 شهور فقط.
- اهم حاجه في الحساب البنكي هو عمليات السحب والايداع. لانهم هما بيطلبوا منك كشف حساب لاخر 6 شهور عشان يعرفوا منه طريقه صرفك وطريقه حياتك وهل انت مستقر في بلدك ولا لا. لو مش معاك حساب بنكي ممكن تستخدم كشف حساب والدك او والدتك او احد اخواتك مع تعهد منهم بتحمل مصاريفك اثناء رحلتك (ملحوظة: حساب الاخوات بينفع عادي جدا بشرط ان اخوكي او اختك يكونوا اكبر منك).
- كام لازم يكون في الحساب البنكي؟ معظم السفارات بتفترض وجود 50 يورو في حسابك عن كل يوم هتقضيه هناك في البلد المسافر ليها. يعني لو هتسافر مثلا اسبوع يبقي تضرب 50 يورو في اسبوع وتشوف هيطلعلك كام في الاخر ويكون رصيدك في البنك ميقلش عن الرقم ده.
- كشف حساب البريد (البوسطه) مقبول بيه في السفارات. لكن المهم انه ميكونش حساب غير مستخدم ولكن لازم يكون عليه حركه سحب وايداع مستمرة.
خطاب العمل والمعروف بأسمHR letter :
- هتجيب HR letter من شغلك مكتوب فيها انك شغال في المكان دا وبالتاريخ من اول ما بدأت الشغل وكمان مرتبك الشهري او السنوي.
- جواب مكتوب فيه هتاخد اجازة من يوم كام ليوم كام. وكمان ان مدير العمل موافق علي انك تاخد اجازة وبعد انتهاء الاجازة انك راجع تاني للشغل.
- لو متأمن عليك في الشغل لازم تكتب رقمك التأمين في HR letter وبعدين ف الاخر هتكتب عنوان الشركه والايميل او رقم التليفون الخاص بالعمل ومتنساش تختمه من الشركه ختم رسمي ويكون متوجهه الي سفارة الدولة اللي عايز تقدم عليها.
- لو بتشتغل شغل خاص يبقي هتجيب سجل تجاري وبطاقه ضريبيه ولازم يكون عدي علي الاقل سنه من تاريخ انشاء الشركه ويكون ليك ملف ضريبي حقيقي.
طيب ولو لسه طالب؟
- لو لسه طالب هتجيب شهادة قيد من شئون الطلاب في الكلية اللي بتتدرس فيها.
طيب ولو بتشتغل شغل حر (فريلانسر)
- الفريلانس المعتمد والمعروف لدي السفارات هو اللي بتجيله تحويلات وايداعات منتظمه شهريه من المؤسسات والشركات اللي بيتعامل معاها اونلاين ويكون عنده نسبه من الارباح لدي الشركات دي. يعني يكون بيتحول في حسابك ايداعات منتظمه شهريه تثبت انك فعلا بتشتغل شغل حر او بيتبعتلك تحويلات بنكيه منتظمه بكل المبالغ اللي بتشتغل بيها مع المواقع او بيجيلك ارباح من شغلك بايداعات منتظمه برضو او بشيكات مقبوله الدفع. وعند التقديم بتاخد الشيكات دي وبتحطها ف حسابك ودة اثبات تعاقداتك مع الشركات الاونلاين دي.
طيب ولو متخرج ومش بتشتغل
- هتكتب في الابلكيشن انك مش بتشتغل ولكن الاعتماد كله ساعتها هيكون علي كشف الحساب البنكي لازم يكون قوي عشان يوافقوا ان حد مش بيشتغل يسافر اوروبا.
طيب ولو بتاخد معاش يعني لا بتشتغل ولا بتدرس
- بتاخد شهادة من التامينات مع باقى الورق انك على المعاش.
حجز الفندق:
- جمع سفارات دول الشنجن بتطلب حجز مبدئي مش مؤكد من موقع Booking (ولكن سفاره دولة اليونان بتطلب حجز مؤكد ومدفوع كمان ويكون من الفندق نفسة).
- تقدر تحجز الفندق من موقع Booking مثلا وتختار الفنادق اللي تقدر تلغي الحجز فيها ببلاش (Free cancelation).
- لو هتقعد مثلا اسبوع او 10 ايام او اسبوعين في بلد معينه متحجزش كل الحجوزات في فندق واحد او مدينه واحدة لأن مفيش سائح بيقعد في مدينه واحدة او في فندق واحد بس طول مده رحلته الطويلة.
حجز الطيران:
- تقدر تعمل حجز طيران مبدئي ومفيش سفاره شنجن بتطلب حجز طيران مؤكد.
التأمين الطبي للسفر:
- تقدر تعمل تأمين طبي من اي شركة تأمينات. ولازم يكون مكتوب في الورقة ان الحد الادنى للتأمين فيها 30 الف يورو وانها صالحه لكل منطقه الشنجن وهتغطي فتره اقامتك بالكامل في منطقه الشنجن.
جواز سفر ساري:
- يجب ان يكون لديك جواز سفر ساري وصورة من جواز السفر ويكون صالح لمدة 6 شهور (علي الاقل).
لو باسبورك فيه اختام و فيزا سابقه يبقي هتصور كل الاختام والفيز دي وترفقها مع الورق.
الصور الشخصية:
- الصور المطلوبه للحصول علي فيزا شنجن صورتين خلفيه بيضاء مقاسها بيختلف حسب السفاره ولكن اغلب السفارات بتطلب ان مقاس الصوره يكون 3.5*4.5.
شهادة التحركات:
- شهادة بتثبت فيها تحركاتك وسفرياتك خارج البلاد في اخر 7 سنوات.
ملئ ابلكيشن تقديم علي السفارات:
تقدر انك تملي الابليكشن الكتروني علي الكمبيوتر او اللابتوب وبعدين تطبعة وتمضي عليه.
كيف تتعامل مع السفارات الان؟
- دلوقت معظم السفارات التابعة لدول الشنجن بتتعامل مع وسيط ومش بتتعامل مع الاشخاص مباشرة. يعني حضرتك مطلوب منك تروح لمكتب تابع للسفارة اللي عايز تقدم اوراقك فيها وبتروح تسلم ليهم اوراقك وبتعمل البصمات وبتتدفع الفلوس ليهم وبتمشي. المكتب بدورة بيدي المستندات وكل حاجه تخصك للسفارة وبعدين السفارة بتفحص كل المستندات دي وبعدين المكتب بيتصل بيك وهكذا.
كم رسوم الفيزا الشنجن؟
- رسوم الفيزا 80 يورو (تختلف تبعا لكل سفارة) بالاضافة الي المكتب الذي ستقدم اوراقك من خلالة (بتقدر تتدفع الرسوم بعملة بلدك الا سفارة المجر بتطلب الرسوم باليورو).
- كل المستندات المطلوبة منك بتقدر تترجمها للغة الانجليزية او لغة البلد اللي عايز تسافر عليها، وتقدر تعرف مكاتب الترجمة المعتمدة لكل سفارة من خلال الموقع الرسمي للسفارة نفسة.
الاسئله الشائعة من جميع الأشخاص
اي اسهل سفاره اخد منها شنجن؟
- مفيش حاجة اسمها سفارة سهله او صعبة ولكن لو ورقك كله مظبوط اذن مفيش حاجة هاتعطلك. ولو بتقدم اول مرة علي فيزا شنجن قدم علي سياحة في اسبانيا او فرنسا او ايطاليا او هولندا او ألمانيا.
انا اترفضت في الشنجن بيأثر عليا لما اقدم تاني؟
- لا
انا اترفضت في الشنجن لازم استني 6 شهور عشان اقدم تاني؟
- لا (تقدر تقدم من تاني يوم)
انا اترفضت في الشنجن بيختموا علي الباسبور؟
- لا
انا اترفضت في الشنجن لازم اقدم من نفس السفاره اللي اترفضت فيها ؟
- لا
انا اترفضت في الشنجن التظلم اي كلام وتحصيل حاصل؟
- التظلم بينفع في بعض الاوقات
انا باسبوري ابيض هل هاتقبل واخد فيزا شنجن ؟
- ينفع تتقبل عادي جدا
انا خدت شنجن ومسافرتش بيها هترفض لو قدمت تاني؟
- لا مش هاتترفض عادي جدا انك تتقبل
خطه الرحله مطلوبه مني من ضمن الاوراق؟
علي الرغم انها مش متطلب اجباري ولكن من الافضل انك تعملها علشان تبين ان عندك خطة وهدف محدد رايح عليه.